Epigraphical study at Karle Caves (Marathi article) -- Part 2.
कार्ले येथील अनेक शिलालेखांमधून दिसून येणारी एक विशेष गोष्ट अशी की " धेनुकाकट " या नगरातील अनेक लोकांनी येथे दान दिले आहे आणि त्या मध्ये " यवन " लोकांची संख्याही लक्षणीय आहे . हे " यवन " लोक म्हणजे बॅक्ट्रिया ( सध्याचा उत्तर - पश्चिम अफगाणिस्तान ) येथील ग्रीक लोक होत . या अनुषंगाने प्रकर्षाने जाणवणारी गोष्ट म्हणजे त्याकाळीं विविध धर्मांमध्ये असलेले सौहार्दपूर्ण संबंध आणि कुतूहल ! अनेक ग्रीक आणि पर्शिअन लोकांनी बौद्ध लेण्यांना अनेकवेळा भेटी देऊन मुक्त हस्तांनी देणग्याही दिलेल्या दिसतात . यातील काही लोक येथे शिकायलाही आलेले होते , तसेच काहींनी बौद्ध शिकवणही आचरली होती . धेनुकाकट हे नगर नक्की कुठले हे अजूनतरी माझ्या वाचनात आलेले नाही . कोणास याबद्दल माहिती असल्यास कृपया कळवा . ह्या भागात पुढील काही शिलालेख पाहू . चैत्यगृहात प्रवेश केल्यावर डावीकडील खांब क्र . ५ हा लेख खांबाच्या दोन्ही बाजू मिळून लिहिला आहे . पहिल्या वाक्याचा अर्धा भाग डावीकडील बाजूवर तर उर्वरित भाग उजवीकडील बाजूवर ( फुलाच्या वर ) आहे . दुसरे वाक्य परत डावीकडील बाजूवर आहे .
